1/22/2008 10:11 PM يوميات طفل شارع ..الجزء الخامس (13 Comments)
- ♥SoMa♥
- 20, Egypt
يوميات طفل شارع ..الجزء الخامس
glitter-graphics.com
1
يوميات طفل
2
يوميات طفل ..الجزء الثانى
3
ضروورى يا شباب
4
يوميات طفل ..3
5
يوميات طفل شارع..الجزء الرابع
يلا نتابع مع بعض باقى قصه مصطفى مع سيد ونشوف ايه اللى حيحصل
.
.
.
.
.
.
.
.
- يلا تعالى ودينى هو فين
- جابر : يلا يا باشا
" وقعدنا نمشى بتاع خمس دقايق لحد ما وصلنا لشبه شقه كده فى الدور
الارضى ... قام جابر منادى على اللى جوه"
- جابر : حوده ... افتح ياض
- وفتح حوده
.
.
.
دى كانت اخر كلمات قريناها من المشهد اللى فات
اللى هانعرف بقيت تفاصيله دلوقتى
.
.
.
.
.
.
.
.
.
.
.
.
.
.
.
.
.
" لقيت شويه عيال محشورين فى مكان صغير وكان من ضمنهم سيد "
- ازيك يا سيد
- انت؟؟؟
ايه اللى حصل
جابر: انت تعرفه؟؟
"انا وقد ملئ الخوف قلبى وبدت علىّ ملامح الارتياب"
- ايوه يعرفنى... هو انا ورايا غيركم
" ينظر سيد الىّ ثم الى جابر ثم الىّ مره اخرى .. مشفقا علىّ مما يمكن ان
يحدث اذا علم جابر بأمرى ... ولكنه لم يتحدث بكلمه"
- قوم يا سيد عاوز اتكلم معاك بره
- جابر: بره فين يا باشا؟
- انت مالك انت ؟
- جابر: مش القصد ... بس انت عارف ان العيال دول مسؤلين منى
- ماتخفش يا خفيف ... هاتكلم معه شويه وهايرجعلك
- جابر: يا باشا قولى لو عمل حاجه وانا اربيهولك؟
- لا معملش .. تعالى يا سيد
" قام سيد دون ان يتحدث بكلمه واحده ... كم اقدر له ذلك"
" لم انطق انا الاخر بكلمه اخرى الا بعد ان انطلقنا عبر الشارع سوياً"
- ازيك يا سيد
- انتا عاوز ايه؟؟
انت عارف ايه اللى كان ممكن يحصلك لو جابر عرف حقيقتك؟
- اه عارف
- وبرضه جيت برجليك ... ماتكونشى من بقيت اهلى وانا ماعرفش؟
- لا مش من اهلك ... بس مهتم بيك ونفسى تكون احسن
- اشمعنى انا ؟
- مش انت وبس ... واطفال كتيير اوى زيك
بس مانكرش انك شدتنى ليك
- على فكره انا مش مصدق قوى حكايه انك عاوز تخدمنى لوجه الله دى
- وانا ماطلبتش منك تصدقنى دلوقتى
كل اللى بطلبه منك انك تقتحلى قلبك
- افتحه ازاى يعنى؟
" لم اقف عند سؤاله كثيرا واكملت حديثى"
-انا عرفت انهم كانوا واخدينكم اشتباه لحد ماجابر ضمنكم ولقوا
اللى عمل العمله " اومأ برأسه بالايجاب "
- وبعدين ايه اللى حصل لدماغك
- لا عادى ... اتفتحت
- من ايه.؟
- من البوكس
- بوكس ايه؟
- عربيه البوليس يعنى
-هو ايه اللى حصل ؟ احكيلى ...
قبضوا عليكم ازاى
- كنت انا وحوده والبت توته قاعدين تحت الكوبرى بنريح شويه
لقينا البوكس طابب علينا والمخبرين نازلين منه
احنا طلعنا نجرى بس حوده ماكانش واخد باله
فالمخبر مسكه على طول
وطلعت اجرى انا وتوته
والمخبر التانى والعسكرى بيجروا ورانا
كنت هاهرب بي المخبر التانى عملوا عليه كماشه ولاد الذين
قام ابن ال.... مسكنى من قفايا وقعد يضربنى بالشلاليت
وجرنى لحد ما وصلنا قدام البوكس وقام رامينى على البوكس
قامت دماغى اتخبطت فى البوكس واتفتحت
وشويه ولقيت العسكرى جايب توته من شعرها ومدخلها البوكس
- ودماغك .؟
- مالها؟
- العسكرى عملك ايه ... عالجك ازاى يعنى؟
- عالجنى؟ انت عبيط يا عم الحاج؟
دى البت توته قطعتلى حته من كم الفانله اللى انا لابسها
وقامت كاتمه دماغى بيها
بس على فكره ... انا ماكنتش ساكت انا ضربت المخبر برضه وهو
بيأفشنى... خد اللى فيه النصيب برضه
- وعملوا ايه معاك فى القسم؟
- ابدا ... ادونا الاصطباحه التمام ورمونا فى التخشيبه
وحطو توته فى تخشيبه الحريم
وقعدنا على كده كام يوم
لحد ماجابر جه وضمنا وخرجنا
- اه ... عشان كده بقه كنت بتديله اليوميه بتاعتك
- عليك نووووووور ... مانتا شاطر اهو
..............
- ما تحكيلى يا سيد كده بيعملوا معاك ايه فى القسم وبيعاملوك ازاى؟
- هايعملوا ايه يعنى اهو زى مانتا شايف
كل ما تحصل مصيبه ييجوا يلمونا بالطريقه دى
ويرمونا فى التخشيبه لحد مايبانلنا صاحب
او لحد ما يلاقوا اللى عمل العمله
وطبعا مش بيبانلنا صاحب
وكل يوم يخرجونا من الزنزانه بالدور يعنى
اهو اللى يمسح القسم
واللى ينضف الحمامات
اهو اى حاجه محتاجينها وخلاص
مصلحه يعنى
بس اهو ارحم من القعاد فى التخشيبه
- ليه يا سيد ؟ هو ايه اللى بيحصل فى التخشيبه؟
- ربنا مايوريك
- اصل التخشيبه دى زى الغابه بعيد عنك
الصغير بياكل الكبير
واحنا بقى الصغيرين
وياريت بياكله وبس
داساعات بيبهدله ويمسح بيه البلاط
- بيعمولولك ايه يعنى
- بص اصل انت كده شكلك خام وماتعرفش حاجه
- اه معلش اعذرنى
- كل زنزانه ولا تخشيبه بيبقى ليها كومانده ... كبير التخشيبه يعنى
وحكمه نافذ عالكل ... يؤمر بس
- وده بيبقى مين وعلى حسب ايه؟
- بيبقى اقدم واحد واجمد واحد
واحنا بقى والعيال اللى زينا شويه الملاطيش اللى بيعملوا اللى
يؤمرهم بيه
- بيعملك ايه يعنى؟
- اى حاجه وكل حاجه تيجى على بالك
طبعا ده بعد ما يأشطنى من اى حاجه معايا
- طيب لو مارضتش؟
- مفيش حاجه اسمها لو مرضتش
يبقى استلقى وعدك بقى يا خفيف
هاتتشرح
- طيب ما تشتكى للظابط ولا العسكرى اللى واقف حراسه
- اشتكى .... ههههههههه ضحكتنى وانا ماليش نفس
اشتكى ايه هما اللى زيى ليهم لازمه
ما العساكر بيبقوا سامعين كل حاجه وشايفين كل حاجه
وبيعملوا نفسهم عمى وطرش
مش عاوزين يجيبو وجع الدماغ لنفسهم
يا عم
اهى اياااااااااام
واحنا اتعودنا على كده خلاص
انت عارف ؟
- ايه؟
- انا اللى صعبان عليا البت توته بتتبهدل يا عينى
- هى كمان بتتبهدل فى تخشيبه الستات؟
- يا عم دى تخشيبه الرجاله ارحم
دى تخشيبه الستات دى لعنه
دى البت بتحكيلنا حاجات
مابيرحموهاش بيبهدلوها اخر بهدله
- انت تعرفها من امتى؟
- من زمااان
انا وهى وحوده عشره عمر
- عمر ؟ هو انتوا اساسا اد ايه يا سيد؟
- انت مش مصدق
احنا التلاته كده اكتر من الاخوات
اسئله للنقاش
ايه هو التصرف اللى هاتعمله اول ما شفت سيد
وتفتكر ايه هو رد الفعل اللى حصل من جابر؟؟؟؟؟
تفتكر ليه سيد مارضاش يقول لجابر على حقيقه مصطفى؟؟؟؟؟
-"على فكره انا مش مصدق قوى حكايه انك عاوز تخدمنى لوجه الله دى"
ليه سيد قال الجمله دى وتفتكر هو بيقولها بجد ولا ابتدى يعرف ان مصطفى عاوز يساعده بجد؟
-ايه رأيك فى تصرف العسكرى وامناء الشرطه اثناء القبض على الاطفال
وتفتكر ده معمم على كل العساكر والامناء؟
-حال الاطفال دول داخل التخشيبه والانتهاكات اللى بيتعرضوا ليها
تفتكر مين مسؤل عنها ؟؟ والحل فيها ايه من وجهه نظرك؟؟؟
- ايه رأيك وتعليقك على حال الاطفال التلاته ووصف سيد انهم اكتر من الاخوات
تفتكر ان احاسيسهم دى حقيقيه وقويه؟؟؟؟؟؟
aaaa - ssss
1/23/2008 11:23 AMRe: Re: يوميات طفل شارع ..الجزء الخام
بالنسبه للسؤال الاول ياعبدر الرحمن
يعنى مثلا انت لو مكان مصطفى وبتدور على سيد بقالك كام يوم حيكون ايه تصرفك اول ماتشوفه؟؟
وتفتكر بعد كده جابر عمل ايه مع سيد؟؟ سأله مثلا انت عملت ايه ؟ ولا مين ده ؟ وايه النظام
بس كدا
واخيرا اشكرك على ارائك والمناقشه
وجزاك الله خير
:)
1/23/2008 9:51 AMRe: يوميات طفل شارع ..الجزء الخامس
اعذريني إذا ماجاوبت على الأسلئلة بتاعت القصص لإنو بسوريا مافي الشريحة دي من الناس والأطفال ولا حتى الأوضاع اللي في مصر فماراح يكون عندي الإجابة الصحيحة ولا حتى إجابة قريبة على أسئلتك
1/23/2008 1:16 PMRe: يوميات طفل شارع ..الجزء الخامس
2-طبعا علشان خاف على مصطفى
3-لان الطبيعى دلوقتى قليل جدا اللى بيعملو حاجه لوجه الله
4-طبعا طريقه متخلفه من ناس متخلفه
بس ده سياسه منظمه ياعنى هما واخدين اوامر بكده
وهم حتى مش فهمين حاجه فى اى حاجه بالنسبه لهم فرصه
فى التحكم والسيطره
5-الموضع ده متابع من زمان واساسا العساكر اللى بره ليهم مصالح كتير من الموضوع ده
ملحوظه اسلوب الكتابه اكتر من رائع
1/23/2008 3:14 PMRe: يوميات طفل شارع ..الجزء الخامس
السلام عليكم ورحمه الله وبركاته
كان اشتياق اني اقرا بقيت الموضوع لاني فعلا بقيت متعاطف مع الاولاد اللي زي دول المهم سيد مرضيش يقول لجابر ع حقيقة مصطفي لاكتر من سبب الاخ مصطفي لما راح جابر افتكره واحد من المباحث او كده ولما طلب سيد بالاخص جابر استغرب وكمان لما الاخ مصطفي راح يشوف سيد وشافه كويس ان سيد ماقلش الحقيقة لانه لو قال الحقيقة كان هيحصل مشاكل كتيرة لاخ مصطفي نيجي لحكاية العساكر وامناء الشرطة اه العساكر والمخبرين بيضربوا مش يعرفوا اي حاجة الا الضرب ويعرف ان اللي ادامه مذنب ميعرفش اكتر من كده مع ان اللي ادامه ممكن يكون مش ليه اي ذنب هوه مجبر ع الضرب اما الامناء فاكرين نفسهم ظباط او رتبة عالية وخلاص ده لنسبة لامناء ونسبة كبيرة المهم دي مشكلة كبيرة اما بالنسبة اللي بيحصل ف التخشبية فهو حقيقي احنا ممكن نكذب ع نفسنا ونقول لاء مفيش حاجة بتحصل من دي المجرمين ف الزانزانة قصدي ف التخشبية بيبهدلوا بعض بهدلة كبيرة اووي وده للرجاله بس لستات بيهدلوا بعض بهدلة اعوذ بالله منها وانتهاكات عروض وحاجات ماسفة لينا كلنا
العساكر بتبقي واقفة مش بتتكلم يعني مثل بيقول ودن من طين وودن من عجين
ولما يحسوا ان المشكلة كبرت اوي وخلاص ناس هتموت يبدا الامناء والعساكر لفض المشكلة
بس لحكاية انهم اخوات واحساسيهم قوية انا من راي انهم فعلا بيحسوا كده وممكن يكونوا اكتر من الاخوات ليه علشان الزمن قسي عليهم مع بعض وخدموا بعض وعملوا حاجات كتيرة لبعض يعني واحد انقذ التاني من البوليس مثلا
بس ف مشكلة احتمال حدوثها كبير نوعا ما وانا اتمني انها مش تحصل
الاخ مصطفي لما سال سيد عن عمره وعن عمر اصحابه يعني معني انهم قد بعض وكمان اطفال لسه ممكن لما يكبروا الاحاسيس دي تتغير وتبقي مشكلة تانية اكيد رسالتي وصلت وانا اسف اووووووووي اني طولت عليكي بس الموضوع بقي يهمني جدا
1/23/2008 3:31 PMRe: Re: Re: يوميات طفل شارع ..الجزء الخ
1/24/2008 8:07 AMRe: يوميات طفل شارع ..الجزء الخامس
.
.
اكيد هبص لسيد واتأمله حتا حته
وجابر اكيد هيسأل سيد ويطلع عينه لحد ميقول مين دا
بس سيد مش هيقول أكيد هيفبرك اي حاجة
لانه لو كان عاوز يقول كان قال من الاول
.
ممكن سيد مرضاش يقول لجابر لانه بدا يحب مصطفى
لان لاول مرا لقا حد يسال عليه ودي نعمه
.
.
.
على فكره انا مش مصدق قوى حكايه انك عاوز تخدمنى لوجه الله دى"
طالما سيد قال كدا يبقا بدأ يصدق انه فعلا عاوز يساعده
أو بيدي لنفسه أمل في حياة انضف
.
.
ايه رأيك فى تصرف العسكرى وامناء الشرطه اثناء القبض على الاطفال
وتفتكر ده معمم على كل العساكر والامناء؟
90% منهم بيعملم كدا
وطبعا
no comment its egyptian polic
.
.
حال الاطفال دول داخل التخشيبه والانتهاكات اللى بيتعرضوا ليها
تفتكر مين مسؤل عنها ؟؟ والحل فيها ايه من وجهه نظرك؟؟؟
المسؤل عنها المسؤلين عن السجون من أول مأمور السجن لحد اصغر عسكري
وطبعا المسؤلية بتكبر كل اما الرتبة كبرت
والحل في تصحية الضمير شويا
.
.
.
رأيك وتعليقك على حال الاطفال التلاته ووصف سيد انهم اكتر من الاخوات
تفتكر ان احاسيسهم دى حقيقيه وقويه؟؟؟؟؟؟
طبعا احاسيسهم اقوي مايكون
انا اتحدى ان احاسيس اي حد فينا تكون زيهم
بجد البهدله بتدي احاسيس في غاية القوة
.
.
.
.
.
والرد الاخير على كل دا
جابر
الامين
العساكر
المخبرين
الخوف
كل حاجة
انا اقدر ارد عليها بنظرية للدكتور مصطفى فؤاد نائب رئيس جامعة طنطا واستاذ قانون دولي وانا بعتز بالشخصية دي جدا وأكتر دكتور احترمته في حياتي على الرغم اني مش حقوق
النظرية بتقول ان السلطة في ايد الفئة المسيطرة
هيا صحيح بعيد عن الاحلام والامال
بس بتزصف امر واقع.
.
.
.
.
.
.
.
.
.
لا اله الا انت سبحانك اني كنت من الظالمين
1/23/2008 7:36 AMRe: يوميات طفل شارع ..الجزء الخامس
أنا مش عارف ليه حاسس إني شفت الحكاية دي في فيلم قبل كده
ومع موسيقى تيتو دي كمان الموضوع واخد شكل الفيلم قوي
بس تشكيلة مابين فيلم تيتو وفيلم بلية ودماغه العالية
على فكرة أنا مش باكذبك في إن الموضوع حقيقة بس هو فعلا واخد شكل فيلم قوي
عموما الموضوع ابتدى يحلو وهانشوف حاجات أكيد حلوة كتير من مصطفى لأني شايف إنه جرئ قوي ودي ميزة هاتخليه يعمل من الولد ده حاجة كويسة
بالنسبة للأسئلة يعني أعتقد إني هاقول إن موضوع مسك الأطفال ده شيء طبيعي وبالطريقة القذرة دي ويمكن أكتر من كده كمان
واللي بيحصل في الزنزانة ده شيء خرافي الواد حتى مانطقش وقال ربع اللي بيحصل دي مهزلة بكل المقاييس
والمخبرين والعساكر بتوعنا ربنا يحميهم يا رب ونشوفهم منورين كده في وسط حريقة وياريت لو كان بركان لأن دي ناس بتنفذ أوامر من غير تفكير شوية بقر يعني مش متخيلين لو ابنهم مكان حد من العيال دول كان إيه اللي حصله يعني مافيش أي إحساس ولا شعور
وعلشان خاطري يا أحلى سومة في الدنيا طولي الموضوع شوية كمان إنتي ليه بخيلة قوي علينا كده ؟؟؟؟؟
يا إما تخليها حلقات يومية علشان التفاصيل ماتروحش من دماغنا ونضطر نرجع نقرا الموضوع من الأول بعد غيابك
سلام
1/23/2008 11:39 AMRe: Re: يوميات طفل شارع ..الجزء الخام
وعليكم السلام ورحمه الله وبركاته
بالنسبه لان حضرتك شوفت الحكايه دى فى فيلم اكيد حجاوبك واقول لا طبعا
وبالنسبه ان القصه تشكيله من فيلم تيتو وبليه ..فا أنا ممكن احكيلك قصتين الفيلم حتلاقى ان مش ولا قصه فى دول
;)
وبالنسبه تانى لان الموضوع اخد شكل فيلم
فأنا حقولك حاجه بسيطه
ان الافلام دى بتتعمل من الواقع
يعنى اكيد بيتكلموا عن ظاهره موجوده بالفعل
لكن حقولك برضه ان دى قصه واقعيه مش فيلم
:)
وبالنسبه انى اطول الموضوع اكتر من كده مش حينفع علشان اللى بيقرا الموضوع مايملش ومايحسش ان الموضوع تقيل
وكنت عايزه بس اعلق على حضرتك فى نقطه حضرتك قولتها فى الجزء التالت
لما قولت كده
(الجزء المرة دي ضعيف قوىىىىىىىىىىىىىىىىىىىىىى
يعني مافيش جديد حصل كان المفروض الموضوع يطول شوية مش مجرد مرواحة للقسم والسؤال وخلاص الحلقة تخلص
كان ممكن يكون في شوية حاجات تانية يعني لغاية لما تلاقي الولد مثلا ونشوف رد الفعل مع المقابلة إيه ؟)
كنت عايزه اقولك ان احنا مش بنركز فى القصه على حكايه سيد وبس
لا دى قصه بتتناول جميع افراد الشعب وتصرفهم ايه مع اطفال الشوارع
لان دى قضيه عامه
يعنى مينفعش مانتكلمش على القسم واللى بيحصل جواه لازم نتكلم عن كل حاجه بتحصل مش مجرد طول القصه تكون سيد وخلاص
كده مش حيكون ليها اى لازمه لاننا حنكون عرفنا مشكله الطفل وخلاص
انما احنا لازم نعرف المجتمع كله ونظرته لاطفال الشوارع
واتمنى تكون فهمت وجهه نظرى
واتمنى ماكونش تقلت عليك
واشكرك على ارائك
:)
1/23/2008 11:56 AMRe: يوميات طفل شارع ..الجزء الخامس
أنا قلت إن الموضوع أخد شكل فيلم لكن ماقلتش إن الموضوع مش حقيقي بالطبع وأعتقد إني وضحت كده
وبعدين الكلام من الأول كان على سيد وعلشان كده أنا عاوز أوصل لأخر الحكاية علشان أعرف إحنا ممكن نعمل حاجة ونساهم بأي حاجة في مضوع سيد ده ولا لأ ؟؟؟؟
يعني ماكنتش واخد إن الموضوع هايطول علشان ندخل في البلد وحال البلد اللي كلنا عارفينه
وبالمناسبة كده إنتي ناوية تعملي مليون موضوع جوة بعض يعني مش هاتسيبي حاجة إلا لما تتكلمي فيها وبكده مافيش حد تاني هايلاقي مواضيع يناقشها بس هاتبقى في مشكلة إنك بتاخدي الموضوع هامشي قوي يعني لو هانتكلم عن القسم كمثال مش هانتكلم بهامشية قوي زي ماتكلمتي كده لأ إحنا ممكن ناخد الموضوع ونعمل منه ثورة لأنه موضوع كبير جدا
عرفتي بقى أنا باتكلم على حكاية سيد بالذات ليه لأنها أساس الموضوع والتفرعات اللي خارجة منه ممكن تتناقش على الهامش وماتكونش أساس الموضوع هي كمان وإلا زي ماقلتلك أي حد هايحاول يكتب موضوع بره ويكون اتناقش عندك هانقوله إحنا ناقشناه في موضوعك وبكده موضوع هايتفرع لمليون موضوع زي ما قلت في الأول
وأنا مش عاوزك تزعلي من كلامي بالعكس أنا مستمتع بالموضوع جدا وبادخل كل يوم أدور على الجزء الجديد وباقول يطول شوية لأن دي أحداث قصة حقيقية وبنبقى متشوقين قوي لمعرفة المزيد من التفاصيل
حاسس إني طولت واتراخمت بس ياريت تفهميني صح
مع احترامي وتقديري
1/23/2008 2:53 AMRe: يوميات طفل شارع ..الجزء الخامس
:
ايه هو التصرف اللى هاتعمله اول ما شفت سيد
وتفتكر ايه هو رد الفعل اللى حصل من جابر؟؟؟؟؟
وبالنسبة للباقى
:
تفتكر ليه سيد مارضاش يقول لجابر على حقيقه مصطفى؟؟؟؟؟
متهيألى ان سيد لو عمل كده انه حن او تعاطف شوية مع مصطفى وانه لما لقى ان مصطفى مهتم فعلا كده بالموضوع حس انه فعلا ممكن يكون مصطفى عنده حق وعايز يساعده فعلا
-"على فكره انا مش مصدق قوى حكايه انك عاوز تخدمنى لوجه الله دى"
ليه سيد قال الجمله دى وتفتكر هو بيقولها بجد ولا ابتدى يعرف ان مصطفى عاوز يساعده بجد؟
لا انا متهيألى انه فعلا حس ان مصطفى عايز يساعده بجد بس هو عايز يتأكد لأنه طبعا هو مش متعود على الاهتمام ده وبالذات من حد ميعرفوش اصلا
:S
-ايه رأيك فى تصرف العسكرى وامناء الشرطه اثناء القبض على الاطفال
وتفتكر ده معمم على كل العساكر والامناء؟
رأى على التصرف ده انه لا تعليق وربنا مش بينسى اى بنى ادم مظلوم اكيد
واكيد ده مش معمم على كل العساكر والامناء ولكن برضه على ما اعتقد ان حتى اللى مش كده قليلين جدا للأسف
حال الاطفال دول داخل التخشيبه والانتهاكات اللى بيتعرضوا ليها
تفتكر مين مسؤل عنها ؟؟ والحل فيها ايه من وجهه نظرك؟؟؟
مين المسئول عنها متهيألى كلنا مسئولين عنها والحل ان بجد لو كل واحد خلى عنده شوية ضمير والله فى حاجات كتييير اوى هتتحسن وتبقى احسن
ايه رأيك وتعليقك على حال الاطفال التلاته ووصف سيد انهم اكتر من الاخوات
تفتكر ان احاسيسهم دى حقيقيه وقويه؟؟؟؟؟؟
ده انا مش افتكر ده انا متأكد ان فعلا احاسيسهم دى قوية وحقيقية لأن اللى زى دول مش بيكون ليهم غير بعض اصلا فى الحياة فبيتعلقوا ببعض جامد جدا